Cluergal organiza unha nova edición do curso gratuito sobre instalacións eléctricas de Baixa Tensión. É un curso subvencionado pola Consellería de Emprego, Comercio e Emigración da Xunta de Galicia.
O curso de Instalacións Eléctricas de Baixa Tensión proporciona unha formación integral sobre os aspectos fundamentais para o deseño, instalación e mantemento de instalacións eléctricas de baixa tensión, cumprindo coa normativa vixente e os procedementos administrativos correspondentes. Os participantes aprenderán sobre redes de distribución e previsión de cargas, explorarán en profundidade os distintos elementos que compoñen unha instalación eléctrica e adquirirán coñecementos sobre esquemas de distribución, sistemas de posta a terra e conexións de enlace. Ademais, abórdanse as instalacións interiores en dous módulos diferenciados, afondando na seguridade e eficiencia en diferentes tipos de espazos. Finalmente, cubriranse as técnicas e criterios para instalacións de iluminación, tanto en interiores como en exteriores, permitindo unha formación completa e actualizada no campo da electricidade de baixa tensión (ver PROGRAMA DO CURSO).
O curso ten 60 horas de duración, na modalidade de “Teleformación” (acceso permanente á plataforma). Iníciase o próximo 12 de novembro e finaliza o 10 de decembro de 2024. O prazo de inscrición pecha o 04/11 ou ata que se esgoten as prazas.
Poden inscribirse traballadores en activo ou desempregados de Galicia. As prazas son limitadas e a solicitude non implica a súa aceptación en tanto non sexa comunicada formalmente por Cluergal.
